ਗੀਤ - 5

ਮੇਰੇ ਗੀਤਾਂ ਦੀ ਉਮਰ ਲਮੇਰੀ ਹੋ ਜਾਏ , ਜੇ ਹੁੰਗਾਰਾ ਤੂੰ ਭਰੇਂ

ਦਿਲ ਦੀ ਦੌਲਤ ਸਾਰੀ, ਤੇਰੀ ਹੋ ਜਾਏ , ਜੇ ਹੁੰਗਾਰਾ ਤੂੰ ਭਰੇਂ .

ਦਿਲ ਸੋਚਦਾ ਤੈਨੂੰ , ਦਿਲ ਲੋਚਦਾ ਤੈਨੂੰ 

ਤੇਰੇ ਸਿਵਾ ਸੋਚਣ ਤੋਂ , ਹੈ ਰੋਕਦਾ ਮੈਨੂੰ .

ਮੇਰੇ ਖਾਬਾਂ ਦੀ ਪਰਵਾਜ਼, ਉਚੇਰੀ ਹੋ ਜਾਏ, ਜੇ ਹੁੰਗਾਰਾ ਤੂੰ ਭਰੇਂ 

ਮੇਰੇ ਗੀਤਾਂ ਦੀ ਉਮਰ, ਲਮੇਰੀ ਹੋ ਜਾਏ , ਜੇ ਹੁੰਗਾਰਾ ਤੂੰ ਭਰੇਂ .

ਕੀ ਲੈਣਾਂ ਉਮਰਾਂ ਤੋਂ ,ਜੇ ਪਿਆਰ ਨਾ ਹੋਵੇ 

ਸੁੰਨੀ ਲੱਗੇ ਜਿੰਦਗੀ, ਜੇ ਦਿਲਦਾਰ ਨਾ ਹੋਵੇ .

ਚਾਰ ਦਿਨਾਂ ਦੀ ਜਿੰਦਗੀ, ਬਥੇਰੀ ਹੋ ਜਾਏ, ਜੇ ਹੁੰਗਾਰਾ ਤੂੰ ਭਰੇਂ.

ਮੇਰੇ ਗੀਤਾਂ ਦੀ ਉਮਰ, ਲਮੇਰੀ ਹੋ ਜਾਏ , ਜੇ ਹੁੰਗਾਰਾ ਤੂੰ ਭਰੇਂ .

ਨਹੀਂ ਜਿੱਤਿਆ ਜਾਂਦਾ, ਕਦੇ ਤਲਵਾਰਾਂ ਨਾਲ 

ਜਿੱਤ ਮਿਲਦੀ ਯਾਰ , ਬਸ ਪਿਆਰਾਂ ਨਾਲ .

ਇਹ ਸਾਰੀ ਦੁਨਿਆ 'ਵਿਰਕ', ਮੇਰੀ ਹੋ ਜਾਏ, ਜੇ ਹੁੰਗਾਰਾ ਤੂੰ ਭਰੇਂ

ਮੇਰੇ ਗੀਤਾਂ ਦੀ ਉਮਰ, ਲਮੇਰੀ ਹੋ ਜਾਏ , ਜੇ ਹੁੰਗਾਰਾ ਤੂੰ ਭਰੇਂ .

                           * * * * *

ਗੀਤ - 4

        ਹੋ ਗਿਆ ਹਾਂ ਮੈਂ ਪਾਗਲ 

        ਯਾ ਪਾਗਲ ਹੋਇਆ 

        ਮੇਰਾ ਅਹਸਾਸ ਹੈ .

        ਖੇਡ੍ਹਿਆ ਸੀ ਤੂੰ ਨਾਲ ਮੇਰੇ 
        ਰਹਿ ਗਏ ਤੇਰੇ ਚਾ ਅਧੂਰੇ 
        ਮੇਰੀ ਰੂਹ ਚੱਲੀ ਨਾਲ ਤੇਰੇ 
        ਪਿਛੇ ਬਾਕੀ ਹੈ ਜੋ 
        ਓਹ ਸਾਇਆ ਉਦਾਸ ਹੈ 


        ਸ਼ਿਕਵਾ ਕਿਸ ਨਾਲ ਕਰੀਏ 
        ਤੇਰੇ ਨਾਲ ਅਸੀਂ ਕਿੰਜ ਮਰਿਏ
        ਪਰ ਇਹ ਵਿਛੋੜਾ ਕਿਵੇਂ ਜਰੀਏ 
        ਖਿੰਡ ਗਈ ਹੈ ਖੇਡ ਸਾਰੀ 
        ਨਾ ਬਚੀ ਕੋਈ ਆਸ ਹੈ .


        ਮੰਨਿਆ ਜੱਗ ਨਸ਼ਵਰ ਹੈ 
        ਪਰ ਇਹ ਗੱਲ ਬੇਅਸਰ ਹੈ 
        ਆਪਣਾ ਜਾਵੇ ਜਦੋਂ ਮਰ ਹੈ 
        ਸਜੀ ਹੋਈ ਹੈ ਮਹਫ਼ਿਲ 
        ਤੂੰ ਨਾ ਮੇਰੇ ਪਾਸ ਹੈ 


        ਹੋ ਗਿਆ ਹਾਂ ਮੈਂ ਪਾਗਲ 
        ਯਾ ਪਾਗਲ ਹੋਇਆ 
        ਮੇਰਾ ਅਹਸਾਸ ਹੈ .


               ( ਚਚੇਰੀ ਭੈਣ ਦੇ ਦੇਹਾੰਤ ਤੇ )


               * * * * *

ਗੀਤ -3

     ਰੌਣਾ ਪੈ ਗਇਆ ਪੱਲੇ ,ਮਾਰ ਏਸੀ ਮਾਰੀ ਵੇ 

     ਸਾਡੀ ਜਿੰਦਗੀ ਉਜਾੜੇ , ਬਰਸਾਤ ਖਾਰੀ ਵੇ .

     ਉਦਾਸ ਹੋਇਆ ਘਰ ,ਉਦਾਸ ਹੋਈ ਰੂਹ ਏ 

     ਪਲਕਾਂ ਬਿਛਾਏ ਬੈਠੀ , ਸਾਡੇ ਪਿੰਡ ਦੀ ਜੂਹ ਏ .

     ਸੁੰਨੀਆਂ ਰਾਹਾਂ ਨੂੰ ਮੈਂ ਤਾਂ , ਤੱਕ-ਤੱਕ ਹਾਰੀ ਵੇ .

     ਸਾਡੀ ਜਿੰਦਗੀ ਉਜਾੜੇ , ਬਰਸਾਤ ਖਾਰੀ ਵੇ .

     ਗਮਾਂ ਦੀ ਸੌਗਾਤ ਦਿੱਤੀ ,ਸਾਡੇ ਹਾਸੇ ਖੋਹ ਲਏ

     ਜਿੰਨ੍ਹਾ ਨੂੰ ਅਸੀਂ ਦਿਲ ਦਿੱਤਾ , ਜਾਨ ਲੈ ਕੇ ਓਹ ਗਏ.

     ਬੜੀ ਮਹਿੰਗੀ ਪਈ ਏ , ਇਸ਼ਕ਼ ਖੁਮਾਰੀ ਵੇ .

     ਸਾਡੀ ਜਿੰਦਗੀ ਉਜਾੜੇ , ਬਰਸਾਤ ਖਾਰੀ ਵੇ .

     ਦੱਸ ਕਿਵੇਂ ਭੁੱਲਾਂ ਤੈਨੂੰ ,ਸਾਂਹਾ ' ਚ ਵਸਾਇਆ ਏ 

     ' ਵਿਰਕਾ ' ਵੇ ਪਿਆਰ ਨੇ , ਮਾਰ ਹੀ ਮੁਕਾਇਆ ਏ .

     ਸਦਰਾਂ ਦੀ ਚੋਗ ਖਾ ਕੇ ,ਮਾਰੀ ਤੂੰ ਉਡਾਰੀ ਵੇ .

     ਸਾਡੀ ਜਿੰਦਗੀ ਉਜਾੜੇ , ਬਰਸਾਤ ਖਾਰੀ ਵੇ .

                       * * * * *

ਗੀਤ - 2

ਕਿੰਜ ਜੀਵਾਂ ਇਸ਼ਕ਼ ਨੇ ਕੀਤਾ ਏ ਬੇਦਮ ਸਾਜਨ
ਮੇਰੇ  ਹੱਡੀਂ  ਵੱਸਿਆ  ਏ  ਤੇਰਾ  ਗਮ  ਸਾਜਨ .

ਤਮਾਸ਼ਬੀਨ ਦੁਨਿਆ ਤਮਾਸ਼ਾ ਵੇਖਦੀ ਏ
ਅੱਗ ਲਾਕੇ ਦੂਜਿਆ ਦੇ ਹੱਥ ਸੇਕਦੀ ਏ .
ਲੋਕਾਂ ਕੋਲ ਕਦੋਂ ਮਿਲਦਾ ਏ ਮਲ੍ਹਮ ਸਾਜਨ .
ਮੇਰੇ  ਹੱਡੀਂ  ਵੱਸਿਆ  ਏ  ਤੇਰਾ  ਗਮ  ਸਾਜਨ .


ਹੁਣ ਕਿਸੇ ਕੰਮ ਆਊਨੇ ਦਿਲਾਸੇ ਨਹੀਂ
ਮੇਰੇ ਕੋਲ ਬਾਕੀ ਬਚੇ ਕੋਈ ਹਾਸੇ ਨਹੀਂ .
ਮਨਾ ਆਇਆ ਹਾਂ ਖੁਸ਼ੀਆਂ ਦਾ ਮਾਤਮ ਸਾਜਨ .
ਮੇਰੇ  ਹੱਡੀਂ  ਵੱਸਿਆ  ਏ  ਤੇਰਾ  ਗਮ  ਸਾਜਨ .

ਜਿੰਦਗੀ ਜਿਉਣ ਦਾ ਮੈਨੂੰ ਚੱਜ ਕੋਈ ਨਾਂ
'ਵਿਰਕ' ਮਿਲਿਆ ਵੀ ਮੈਨੂੰ ਸਚ ਕੋਈ ਨਾਂ .
ਬੱਸ ਤੇਰੀਆਂ ਯਾਦਾਂ ਨੂੰ ਲਿਖੇ ਕਲਮ ਸਾਜਨ .
ਮੇਰੇ  ਹੱਡੀਂ  ਵੱਸਿਆ  ਏ  ਤੇਰਾ  ਗਮ  ਸਾਜਨ .    
                * * * * *

ਗੀਤ -1

                           ਤੂੰ ਚੇਤੇ ਆਇਆ ਏਂ 

 
                   ਜਦ ਮੋਰਾਂ ਪੈਲ੍ਹਾਂ ਪਾਈਆਂ ਨੇ
                   ਅੰਬਰਾਂ ਤੇ ਘਟਾਵਾਂ ਛਾਈਆਂ ਨੇ
                   ਵੱਜਣ ਕਿਤੇ ਸ਼ਹਿਨਾਈਆਂ ਨੇ
                   ਤਦ ਤੂੰ ਚੇਤੇ ਆਇਆ ਏਂ .

          ਤੂੰ ਤਾਂ ਜੁੜੀਆਂ ਏਂ ਸਾਡੇ ਸਾਹਾਂ ਨਾਲ
          ਹਰ ਜਨਮ ਰਹੂ ਸਾਨੂੰ ਤੇਰੀ ਭਾਲ .
                    ਜਦ ਪੌਣ ਪੂਰੇ ਦੀ ਵੱਗਦੀ ਏ
                    ਨੈਣਾਂ ਦੀ ਜੋੜੀ ਦਿਲ ਠੱਗਦੀ ਏ
                    ਅੱਗ ਧੁਰ ਅੰਦਰ ਤਕ ਲੱਗਦੀ ਏ
                    ਤਦ ਤੂੰ ਚੇਤੇ ਆਇਆ ਏਂ .

         ਹੰਝੂ ਅੱਖੀਆਂ ਵਿਚ ਕਦ ਰੁਕਦੇ ਨੇ
         ਇਸ਼ਕ਼ ਮਰੀਜ਼ ਸਦਾ ਹੀ ਧੁਖਦੇ ਨੇ .
                     ਜਦ ਕਿਤੇ ਵੱਜੇ ਸੰਗੀਤ ਕੋਈ
                     ਪਿਆਰ ਦੇ ਗਾਏ ਗੀਤ ਕੋਈ
                     ਧੋਖਾ ਦੇ ਜਾਏ ਮਨਮੀਤ ਕੋਈ
                     ਤਦ ਤੂੰ ਚੇਤੇ ਆਇਆ ਏਂ .

         ਦਿਲ ਝੱਲਾ ਏ ' ਵਿਰਕਾ ' ਦਿਲ ਝੱਲਾ ਏ
         ਬੀਤੀ ਗੱਲ ਦਾ ਛੱਡਦਾ ਨਹੀਂ ਪੱਲਾ ਏ
                      ਕੋਈ ਟੁੱਟੇ ਦਿਲ ਨੂੰ ਜਦ ਰੋਏ
                      ਬੇਵਫਾਈ ਦੀ ਕਿਤੇ ਗੱਲ ਹੋਏ
                      ਨੀਂਦ ਚੈਨ ਕਿਸੇ ਦਾ ਜਦ ਖੋਏ

                      ਤਦ ਤੂੰ ਚੇਤੇ ਆਇਆ ਏਂ .

                                *****